Me dhjetëra fermerë në Fier ankohen se po shkojnë drejtë falimentimit sepse nuk kanë ku të shesin prodhimet e tyre. Zona e Frakullës në Fier është shumë e njohur për kultivimin e të gjitha prodhimeve bujqësore, por prej shumë vitesh atje mungojnë pikat e grumbullimit dhe kjo ka futur në kaos tregun në këtë zonë. Në një prononcim për mediat, fermerët tregojnë se ata punojnë të gjithë si familje për të nxjerrë prodhimet në shitje, por në fund malli ju mbetet stok, për shkak se nuk kanë pikë grumbullimi.
Një fermerë thotë se pavarësisht shpenzimeve gjatë kultivimit dhe lodhjes fizike, ai fiton në fund të ditës maksimumi 10 mijë lekë të vjetra. “Prodhime ka, çmimet janë të ulta, pika grumbullimi jo, shitje nuk ka dhe si pasojë prodhimet po hidhen në kanale. Për të arritur deri tek shitja e prodhimeve në treg punon e gjithë familja që nga përgatitja e tokës, mbjellja kultivimi i kulturave të ndryshme e deri tek shitja . Punojmë nga mëngjesi në darkë 12 apo 14 orë burrë e grua dhe nuk nxjerrim 5 mijë apo 10 mijë lek të vjetra në ditë dhe çfarë do bëjmë me to“, u shpreh ai.
Ndërsa një tjetër fermer shprehet se ai dhe disa të tjerë janë mundur të shesin me tezga në anë të autostradës kryesore, por policia nuk i ka lejuar për shkak se nuk janë të pajisur me leje. Kështu ai i bën thirrje qeverisë që ta zgjidh këtë problem, të akordojë një fond për subvencionimin e tyre dhe të ngrejë disa pika grumbullimi sepse në të kundërtën fermerët në këtë zonë do të falimentojnë. “Kemi improvizuar tezga shitje përgjatë autostradës Levan – Tepelenë, por nuk na lejon as policia, disa prej këtyre pikave i ka mbyllur policia e qarkullimit rrugor sepse nuk kemi leje për të shitur aty. Prandaj, ne kërkojmë nga shtetit subvencione dhe treg grumbullimi të prodhimeve të tyre bujqësore. Por duhet edhe certifikimi i tokave që të marrim subvencionet”, u shpreh ai.
Gjatë këtij viti prodhimet bujqësore kanë shënua nivele të larta, por nga na tjetër konsumi ka qenë shumë i ulët, prandaj dhe shumë prodhime kanë shkuar dëm, duke i shtuar këtu faktin që kemi konkurrencë jo të ndershme në treg.
E.H/ gijotina.com/
