Një ndër prioritetet kryesore të Federatës Shqiptare të Futbollit është përmirësimi i infrastrukturës, ku Komiteti Ekzekutiv i FSHF-së ka marrë disa vendime të rëndësishme përgjatë vitit 2021 për zhvillimin e saj në disa stadiume e fusha stërvitore të vendit.
Ky investim konsiston në rikonstruksionin e fushës së këtij stadiumi përmes sistemimit të bazamentit dhe më pas mbjelljen me bar natyral, si dhe në investimin e tre fushave të tjera të reja, që do të jenë me bar natyral dhe artificial, ku njëra do të shërbejë për seancat stërvitore të ekipit të parë dhe stërvitjet e ekipeve zinxhir, e dyta për stërvitjen e fëmijëve deri në moshën U-13, ndërsa do të bëhet edhe rikonstruksioni nga e para e aneksit stërvitor, që do të shërbejë për të gjitha ekipet dhe aktivitetet sportive të shkollave.
Në kuadër të një vizite inspektuese në këtë investim, që pritet të ndryshojë tërësisht infrastrukturën futbollistike në qytetin e Lushnjës, kreu i futbollit shqiptar falënderoi kryetaren e Bashkisë Lushnje, znj. Eriselda Sefa, për gatishmërinë për të investuar në infrastrukturën futbollistike, duke ftuar njëkohësisht të gjitha njësitë vendore dhe të interesuarit për të bashkëpunuar me FSHF-në për të bërë të mundur ndryshimin e infrastrukturës në Shqipëri.
Ndërkaq, kryetarja e Bashkisë së Lushnjës, znj. Eriselda Sefa falënderoi Presidentin e FSHF-së për mbështetjen për të investuar në infrastrukturën futbollistike në qytetin e Lushnjës, duke iu përgjigjur kërkesës së saj për ndërhyrje. “Gjej rastin të falënderoj presidentin Duka, i cili iu përgjigj kërkesës sime të disa muajve më parë, që t’i bëjmë një ëndërr realitet qytetarëve të Lushnjës, atë të rikualifikimit të të gjithë terreneve sportive, por edhe të tapetit të barit të stadiumit. Duke qenë se për 30 vite në këto terrene nuk ishte vënë dorë në asnjë investim, falë kësaj mbështetje, qytetarët e Lushnjës do të kenë terrene sportive më të mira, por edhe ambiente më të rehatshme për të luajtur fëmijët e tyre, por edhe për t’u stërvitur ekipi i tyre i zemrës, Lushnja” – tha në fjalën e saj znj.Sefa.
Discussion about this post