Kryeministri Edi Rama në një komunikim për mediat, tha se ai nuk do të lejojë askënd që thyen besimin e qytetarëve që mbush xhepat duke punuar për shtetin, deklaratë kjo pasi Kuvendi votoi pro arrestimit të Arben Ahmetajt.
“Ne po zhvillojmë betejë historike në të mirë të të gjithëve për këtë vend të bekuar, nuk pajtohem me asnjë që e thyen këtë mirëbesim dhe mandatin për të mbushur xhepin duke punuar për shtetin.
Unë jam nga ata që mbaj mbi shpinë askënd me PS. Jam gati t’i kthej shqiptarëve nderin që më kanë bërë duke më dhënë mandatin”, tha Rama.
Sipas Ramës, drejtësia nuk është më e kapur dhe se vepron mbi çdokënd që shkel ligje.
Rama u shpreh se tashmë çështja në dorë të drejtësisë për të dalë në përfundim nëse Ahmetaj është i pafajshëm apo jo.
“Na u vu para dosja e një punë voluminoze hetimore. Gjykata do ta thotë. Ajo dosje krijon dyshime se dyshime të mjaftueshme që mos ta ndalojmë SPAK për kontroll. Është në dorë të drejtësisë, nëse është një rast fajësie apo pafajësie”, u shpreh Rama.
Ai tha se të pushtetshmit po humbasin pushtet, për shkak të shkeljeve që ata kryejnë.
“Kjo nuk është as dita për të thënë dobësitë dhe të metat e punës e organeve të reja të drejtësisë. As për të shprehur shqetësimet. Kjo është dita për të kujtuar edhe njëherë se ajo që po ndodh me luftën kundër zyrtarëve të lartë dhe fakti që të pushtetshmit po humbasin pushtetin mbi drejtësinë, e ka zanafillën te kjo shumicë që qeveris vendin.
Te vullneti i Partisë Socialiste. Te këmbëngulja, te vendimmarrja më e guximshme në këto tre dekada në kërkim të një drejtësie për Shqipërinë. Të ndërgjegjshëm për gjatësinë e kësaj rruge, për telashet me karakteret e dobëta dhe kohën që fluturon pa u mjaftuar teksa bregu në anën tjetër është ende larg. Kokën lart dhe vetëm përpara”, u shpreh ai.
Discussion about this post