Fredi Beleri, i cili ndodhet në burg me akuzën e blerjes së votave, do të jetë kryetar bashkie për 4 vitet e ardhshme. Deklarata është bërë nga kreu i PBDNJ-së, Vangjel Dule, sipas të cilit Kushtetuta nuk parashikon asnjë afat kohor se kur ai mund të bëjë betimin, përsa kohë ai ka shprehur gadishmërinë që të betohet si kryebashkiak.
Beleri u arrestua dy ditë para zgjedhjeve të 14 majit, ndërsa për ditë me rradhë ai u vendos në qendër të akuzave dhe sulmeve nga Kryeministri Edi Rama.
Gjithsesi Beleri arriti të fitojë mandatin e kryebashkiakut, duke u bërë kështu i zgjedhuri i parë vendor në Shqipëri, që votohet dhe fiton, duke qenë në qeli.
“Nuk ka asnjë afat ligjor që e kufizon z.Beleri që të kryejë betimin që nga momenti që ka shprehur dëshirën për t’ju përgjigjur ligjit dhe Kushtetutës.
Që nga momenti që Beleri nuk ka refuzuar që të kryejë dënimin nuk ka asnjë dispozitë ligjore që çon atë në përfundim të mandatit. Z.Beleri është kryetari i zgjedhur i Himarës dhe si i tillë do ta drejtojë atë, dhe mandati i tij përfundon në 2027-ën”, tha Dule.
Discussion about this post