Trajneri Shpëtim Duro ka analizuar situatën tek skuadra e Partizanit duke theksuar se tashme presioni dhe përgjegjësia është tek drejtuesit e skuadrës të cilët nuk pranuan dorëheqjen e trajnerit Ilir Daja.
“Është situatë jo e mirë, duke pasur parasysh që janë ndërtuar për titull kampion. Sipas statistikave në fillim të kampionatit është skuadra më e shtrenjtë e Superiores. Këtu përfundon dhe debati për investimin. Unë kam lexuar që pas Tiranës, trajneri ka paraqitur dorëheqjen, trajneri ka bërë një akt normal që duhet ta bëjë kur situata nuk është e mirë, por ka besimin e drejtuesve dhe tani pesha u bie atyre.
Nuk është problemi vetëm te rezultatet, pasi mungesa e tyre krijon probleme komplekse. Drejtuesit e dinë më mirë situatën e brendshme, kanë besimin që do të ndryshojnë, por trajneri ka bërë mirë që ka dhënë dorëheqjen.
Titulli? Çdo gjë mund të ndodhë, ka pasur dhe raste të tilla. Tirana po bën parqatije të jashtëzakonshme, ka krijuar shumë distancë me pikët, 12 pikë në 7 javë janë shumë. Ka ende mundësi, por duhet paraqtije e madhe dhe të gabojnë të tjerat”, theksoi Duro i cili u ndal më pas tek Tirana ku komentoi sulmuesin Taulant Seferin.
“E njoh mirë Seferin, pasi para 5 vjetësh kam qenë trajner i Shkëndijës ky ka qenë lojtar i ri 18-vjeç, super i talentuar. Nuk pati rritje në Zvicër, por erdhi sezonin e kaluar te Tirana dhe jo se luajti keq, por se shihet me syrin e lojtarit të Kombëtares. Kampionati shqiptar është shumë i fortë, ka pasur dhe lojtarë të tjetër të Kombëtares që kanë ardhur këtu dhe nuk kanë pasur sukses. Seferi po shpreh vlerat e tij, po shënon, po pason, po mbron. Është pikë referimi dhe e meriton Kombëtaren dhe besoj se nëse vazhdon kështu do të jetë pjesë e mbikëqyrjes për Kombëtaren’’, tha Duro.
