Durrësi ka pritur pushuesit e parë për këtë sezon veror, megjithatë rrugët e qytetit vijojnë të jenë të mbushura me plehra të pa pastruara. Prej dy ditësh nuk është marrë asnjë masë për heqjen e tyre nga rrugët, ndërsa mësohet se shkak për këtë është bërë edhe prishja e marrëveshjes mes operatorit të impiantit të Sharrës dhe qeverisë për shkak të pagesave.
Qytetarët thonë se bashkia duhet të marrë masa si dhe kërkojnë të dinë pse personeli që merret me këtë punë nuk ka dhënë asnjë përgjigje.
“Pikë grumbullimi nuk është vetëm këtu por edhe në rrugë kryesore. Mirë është të mos merremi fare se shikon vetëm pisllëk. Bashkia duhet të marrë masat. Por jo kur të mbarojë sezoni turistik. Mendimi është se duhet punë dhe kërkesë llogarie për personeli që punon këtu.
Na flliqën, ça bëhet kështu. Erë e keqe. Bashkia duhet t’i heqë. Se po vdesim. Të lirohet rruga të vijë makina të marrë plehrat. Ku do vijë makina për të marrë plehrat. Shumë keq plehrat këtu. Përpara ka qenë një aksion i madh në Durrës. Kur kaloj aty nuk ndihem mirë të shikoj gjithë ato plehra. Bashkia duhet të bëjë pastrimet. Unë kisha një hallin tim personal. Shkoj aty nuk më lënë të hyj”, shprehen disa prej tyre për mikrofonin e ABC.
Jo zyrtarisht mësohet se shkak është mos-pagesa e detyrimeve nga ana e qeverisë dhe operatori ka shfrytëzuar momentin e sezonit turistik për të kërkuar edhe pagesat e prapambetura. Që prej mbylljes së vend grumbullimit të plehrave në Porto Romano, Durrësi është përballur disa herë me këtë problematikë./Abcnews
