Prokuroria e Përgjithshme ka bërë me dije se, i ka dërguar sot informacionet që zotëron Ambasadës së Rusisë në vendin tonë lidhur me humbjen e jetës së 4 turistëve në një hotel, në Qerret të Kavajës. Prokuroria e Përgjithshme se në dosje nuk ka ende të dhëna përfundimtarë mbi shkaqet e vdekjes, por i ka paraqitur zyrës diplomatike një informacion lidhur me veprimet hetimore deri në këtë fazë.
Ndërkohë, në Institutin e Policisë Shkencore janë dërguar dy celularë të fikur, të cilët nuk janë hapur dot dhe do të dërgohen drejt Izraelit për të parë komunikimet e fundit që kanë pasur turistët. Me sa duket ecuria e hetimeve varet shumë dhe për momentin është peng deri në hapjen e këtyre aparateve celulare.
Një pjesë e ekspertimeve kërkojnë dhe asistencën ndërkombëtare, ndërsa këtë javë pritet dhe kryerja e eksperimentit hetimor. Prokurorët, në bashkëpunim me ekspertët e shëndetit publik, do të rikrijojnë të njëjtën situatë që ishte në resort më 15 tetor, duke hedhur sërish klor në pishinën e brendshme të hotelit.
Pas kësaj, do të merret sërish një provë ajri dhe uji të pishinës, për të konfirmuar apo hequr të gjitha dyshimet në lidhje me vdekjen e katër turistëve rusë. Nga ana tjetër, mjekësia ligjore ende nuk ka nxjerrë një raport paraprak, ndërsa ushqimet që ata kanë përdorur nuk janë ekzaminuar, pasi ISUV tha se nuk ka kompetencë ligjore në ekzaminimin e tyre.
