Interi i Milanos është 90 minuta larg finales së UEFA Champions League 2022-2023. Klubit zikaltër i mjafton që të mos mposhtet nga rivalët e tyre të Milanit (ose, në rastin më të keq, të mposhtet vetëm me një gol diferencë), në takimin e kthimit që do të luhet këtë të martë në San Siro.
Golat e shpejtë, të realizuar brenda 11 minutave nga Edin Dzeko dhe Henrik Mkitarjan, erdhën si rezultat i dominimit tekniko-taktik të ekipit të drejtuar nga Simone Inzaghi ndaj Milanit që dukej se e kishte mendjen te limitimi i dëmeve si dhe te shpresa për të befasuar rivalin në kundërsulm.
Golat e shënuar nga sulmuesi boshnjak edhe fantazisti armen, ishin historikë për shumë arsye, ata jo vetëm që i dhanë fitoren e parë Interit në një derbi të Champions por gjithashtu vendosën rekord për sa i përket futbollistëve “më të moshuar” që kanë realizuar në një gjysmëfinale të Champions League.
37-vjeçari Dzeko dhe 34-vjeçari Mkitarjan realizuan në të njëjtin takim, duke u bërë çifti i parë over-34 që ia arrin këtij qëllimi.
Kot nuk thonë “të vjetrohesh si vera e mirë”.
Në veçanti për Edin Dzekon, duhet thënë se ai, ashtu si kroati Luka Modric, janë “vjetruar mirë”. Epo, kuzhina ballkanase, me siguri luan rol kryesor.
Discussion about this post