Nën zhurmën e makinerive të punëtorëve, që nxitojnë çdo ditë për të mbyllur në kohën e duhur punën në stadium, Partizani zbarkoi dje në orën 11:00 në fushë për të kryer stërvitjen e radhës. Megjithëse gjithçka është lënë në plan të dytë prej punimeve në stadium, në skuadër situata nuk është edhe aq optimiste.
Vijnë nga dy humbje radhazi dhe ndaj Bylisit të hënën në orën 16:00 do të kërkohet me patjetër fitorja. Në këtë sfidë, ndoshta më shumë se kurrë skuadra ndihet nën presion për të fituar.
Lexo edhe:
Punime në të katërta anët, edhe Demi zbret në fushë/ Ja çfarë ndodh me impiantin e Partizanit
Arsyeja? Duhet përgjigje pas dy hapave fals dhe gjithashtu me patjetër stadiumi i ri duhet përuruar me fitore. Shqiptarët janë shumë supersticiozë. Në këto kushte, mund të justifikohet 100% heshtja e plotë skuadrës dhe mimika e ngrirë e lojtarëve, që nuk buzëqeshin si zakonisht, por as flasin shpesh, siç ndodh në raste të tjera, kur ekziston entuziazmi i fitores. Në garë me kohën vijojnë të jenë Da Silva dhe Bruno Telushi.
Të dy vijnë nga probleme fizike dhe bashkë me mjekët po bëjnë maksimumin për t’u rikuperuar për këtë sfidë. Nga ana tjetër, Matondo është e sigurt se nuk do të jetë i gatshëm. Gjithashtu, në orët e vona të mbrëmjes së djeshme kanë mbërritur në Tiranë pesë titullarët e ftuar nga Kombëtarja për ndeshjen me Katarin.
Sot pritet të zbresin në fushë dhe të stërviten të veçuar, me një program ndryshe. Ajo që ra në sy dje është se si rrallëherë, në impiant nuk kishte asnjë tifoz që ndiqte stërvitjen e skuadrës.
Discussion about this post