Kreu i diplomacisë italiane, Antonio Tajani, ka sqaruar detaje lidhur me marrëveshjen tashmë të nënshkruar mes Kryeministrit Edi Rama dhe homologes italiane, Giorgia Meloni, për ngritjen e dy qendrave për pritjen dhe akomodimin e refugjatëve, që do të kapen në brigjet italiane, në Lezhë.
E ndërsa Qeveria Rama ka miratuar marrëveshjen dhe e ka depozituar për miratim në Kuvend, të njëjtën procedurë duket se po ndjek edhe Italia, e cila do e ratifikojë atë në Parlamentin italian, ku pritet të ketë debate, për shkak të kundërshtive nga opozita atje.
Antonio Tajani e konsideroi si mjaft të rëndësishme marrëveshjen, madje ka rrëzuar edhe dyshimet se ajo ishte e ngjashme me marrëveshjen e arritur mes Britanisë së Madhe dhe Ruandës.
Në këtë kuadër, kreu i diplomacisë italiane shprehet se marrëveshja Rama-Meloni nuk është i krahasueshëm me marrëveshjen mes Britanisë së Madhe dhe Ruandës, pasi nuk ka kontraktim të jashtëm të menaxhimit të kërkesave për azil në një vend të tretë, ndërkohë që nuk ka asnjë shmangie nga të drejtat e garantuara ndërkombëtarisht.
“Marrëveshja Itali-Shqipëri është pjesë e rëndësishme në strategjinë e përgjithshme të qeverisë, në kontekstin ndërkombëtar të paqëndrueshmërisë në rritje, i cili rrezikon rritjen e flukseve migratore dhe tregun e urryer të trafikantëve, një treg që vazhdon të përfitojë nga dëshpërimi dhe të kërkojë viktima, siç ishte edhe mbytja e anijes në Lampedusa”, deklaroi Tajani, në Parlamentin italian.
Ai tha se Italia synon “një qasje të ndryshme në menaxhimin e flukseve migratore dhe një luftë këmbëngulëse kundër trafikimit të qenieve njerëzore janë prioritetet absolute të qeverisë sonë”.
“Parandalimi i largimeve të parregullta, forcimi i kufijve të jashtëm, lufta ndaj kontrabandistëve, përmirësimi i sistemit të riatdhesimit, zgjerimi i kanaleve legale të migracionit, mirëpritja e atyre me të drejtën e mbrojtjes ndërkombëtare: këta janë përbërësit kryesorë të qasjes së re që ne po përpiqemi të vendosim në Europë”, tha Tajani, duke shtuar se “në këtë kuadër futet edhe protokolli i bashkëpunimit me Shqipërinë”.
Duke dhënë detaje mbi marrëveshjen Rama-Meloni, ai theksoi se protokolli përcakton se në të dy qendrat nuk mund të ketë gjithsej më shumë se 3000 emigrantë në të njëjtën kohë.
“Emigrantët do të mund të mbërrijnë në portin shqiptar vetëm me anije të autoriteteve italiane, të përfshira në operacionet e shpëtimit. Nuk do të jetë e mundur të tërhiqen skafet e kontrabandistëve dhe as të drejtohen varkat e menaxhuara nga organizata joqeveritare drejt Shqipërisë. Emigrantët do të kenë saktësisht të njëjtin trajtim të parashikuar nga rregulloret italiane dhe evropiane”, tha ai.
Ai u shpreh se në dy qendrat në Shqipëri do zbatohen standardet e BE-së. “Shqipëria do t’i japë Italisë dy zona pa pagesë: një pikë mbërritjeje në portin e Shëngjinit, në bregdetin verior të vendit dhe një bazë ushtarake në Gjadër rreth 30 kilometra larg portit.
Të dy qendrat do të funksionojnë sipas legjislacionit italian, evropian dhe ndërkombëtar për këtë çështje. Procedurat do të jenë ato italiane dhe do të kryhen ekskluzivisht nga autoritetet administrative dhe gjyqësore italiane.
Në port do të ketë një strukturë të dedikuar për aktivitetet e shpëtimit, ndihmën e parë dhe zbulimin e shenjave dhe gjurmëve të gishtërinjve.
Në strukturën e dytë, që ndodhet në zonën e brendshme, do të shqyrtohet kërkesa për mbrojtje ndërkombëtare dhe për ata që nuk plotësojnë kërkesat do të kryhen procedurat e riatdhesimit”, tha Tajani.
Discussion about this post