Thuajse dy vite nga tërmeti shkatërrues i 26 nëntorit të vitit 2019, kryeministri Edi Rama ende vijon me politikën e tij propagandistike për strehimin e të dëmtuarve.
Rama ka nisur javën me pamje nga blloku i banimit në Kavajë, me shtëpi dhe pallate të ndërtuara, teksa shkruan se, sipas tij shumë shpejt 359 familje do të hyjnë në shtëpitë e reja.
Ndonëse procesi i Rindërtimit ishte planifikuar të përfundonte në fillim të pranverës së këtij viti, qeveria Rama dështoi me sukses në premtimet e saj, ndërsa ka dhënë një tjetër datë se kur do të fillojë shpërndarja e shtëpive dhe apartamenteve të rindërtuara, por nuk ka folur se kur do të përfundojë procesi.
Ditë më parë, zvkryeministri Arben Ahmetaj ka deklaruar se më 25 nëntor do të nisë shpërndarja e pjesës së parë të shtëpive individuale dhe apartamenteve, ndërsa tha se fillimisht do të bëhet shpërndarja e banesave për familjet në nevojë, të moshuarit dhe familjet e policëve të rënë në krye të detyrës, e më pas të tjerët do të marrin banesat me short publik.
Ndonëse, njerëzit e dëmtuar vijojnë të qëndrojnë në çadra, kontejnerë, apo në shtëpi të pabanueshme, qeveria duket se nuk e ka problem, për sa kohë vetë jetojnë në luks të shfrenuar dhe vila në periferi të Tiranës.
