477 nxënës të shkollës 9-vjeçare “Haxhi Qira” në fshatin Borizane të qytetit të Krujës, nuk kanë filluar mësimin këtë të hënë. Kjo për shkak se, që pas tërmetit të nëntorit 2019 shkolla që ata kishin u shemb dhe nuk është ndërtuar akoma.
Drejtoria Arsimore ka vendosur që këta nxënës të ndarë me dy turne duhet t’i drejtohen një shkolle tjetër më të afërt që është ajo e Thumanës. Për të kryer këtë proces transporti, ZVA e qytetit të Krujës ka vënë në dispozicion disa mikrobus, por prindërit nuk janë dakord më këtë vendim. Ata shprehen se, grumbullimi i fëmijëve për të pritur mjetin e transportit bëhet në rrugë kryesore, çka i rrezikon atyre seriozisht jetën.
Ata thonë se është viti i dytë që procedojnë në këtë mënyrë dhe është shumë e vështirë pasi nuk kanë as luksin që njeri nga prindërit të shoqërojë çdo ditë fëmijën derisa të mbërrij mikrobusi, prandaj disa prej tyre nuk i kanë dërguar në shkollë këto ditë.
Prindërit tregojnë se janë ankuar por ankesat e tyre kanë shkuar në vesh të shurdhët. Këtë vit mësimi për të gjithë këta nxënës do të jetë me turne. Në një denoncim të bërë përmes emisionit “ Fix Fare”, prindërit shprehen se kjo situatë i ka frikësuar fëmijët edhe nga meraku i infektimit me koronavirus.
Por edhe pse kanë kaluar dy vjet nga prishja e shkollës nga tërmeti ende nuk është bërë asgjë për përfundimin në kohë të saj dhe që nxënësit të zhvillonin mësim në shkollën e tyre.
E.H/ gijotina.com/
