Shkëlqim Rusi, vëllai i Adem Rusit, shqiptarit që u raportua se vrau veten është shprehur se nuk ka shpresa që do të gjejë drejtësi për këtë ngjarje të rëndë. Në një intervistë për media, Rusi kërkon që të bëhet autopsia e të vëllait në shtetin shqiptar, pasi sipas tij vëllai nuk kishte shfaqur asnjëherë shenja depresioni.
“Morën nënën si fillim në telefon. Na thanë vëllain e kemi dërguar në spital. Po pse i thashë unë, ishte mirë e bukur. Po i dridhej zëri atij. Më tha që vrau veten me lidhëze këpucësh. Ndërkohë që ishte i shoqëruar me gardianë dhe u thashë e keni vrarë ju këtë sepse nuk ka shans që të jetë vetëvrasje kjo gjë. Më thanë që ka lënë një letër, shkrimin e njoha. Ne duam që të bëhet autopsia këtu në Shqipëri sepse nuk na ka shfaqur asnjë lloj shqetësimi. Bëhej transferimi i tij në fakt sa në një burg në tjetrin. Unë e di që nuk do të gjejmë drejtësi dhe do ta qepin dosjen sipas qejfit të tyre, njësoj siç ka ndodhur edhe me kufomat e tjera. I kanë vrarë me kamera në sy dhe nuk kanë pranuar asgjë. Na thanë që është vrarë në dritare të furgonit, me një lidhëse këpucësh, ai ishte 120 kile djalë, i shoqëruar me dy apo tre gardianë burgu. Kjo është një gënjeshtër dhe një përrallë me mbret. Nëse nuk do të shoqëroheshin, do të kishte arratisje çdo ditë,”- tha ai ndër të tjera.
Lajmi për vdekjen e Adem Rusit u raportua nga mediat greke pak ditë më parë, të cilat bënë me dije se shqiptari po transportohej nga spitali i Amfisës ku ishte dërguar për kurim drejt burgut të Malandrinos. Por në një moment, 38-vjeçari pretendohet të ketë varur veten me lidhëset e këpucëve në dritaren e furgonit të policisë, por ndërkohë që duhet të monitorohej gjithë kohën nga gardianët. Ngjarja ka nisur të hetohet, pasi nga autoritetet cilësohet si një rast mjaft i dyshimtë. Edhe vëllai i viktimës shprehet se është e habitshme pasi ai ka qenë i shëndetshëm dhe nuk mund t’i merrte jetën një lidhëse këpucësh.
Discussion about this post