Dyshohet për përdhunimin e një 13-vjeçareje, shpallet në kërkim shqiptari

Një 30-vjeçar shqiptar është shpallur në kërkim nga autoritetet greke pasi dyshohet se ka përdhunuar një 13-vjeçare.

Ngjarja ka ndodhur në qytetin e Evias, ndërsa denoncimi në polici është bërë nga nëna e të miturës.

Kjo e fundit është njohur me 30-vjeçarin përmes rrjeteve sociale dhe sipas raportimeve nga data 20 tetor deri në 4 nëntor ata flisnin rregullisht.

Sipas mediave greke, familja e 13-vjeçares jeton në Nea Styra në Evia jugore dhe 30-vjeçari ka arritur të bindë të miturën të takohen dhe më pas e ka përdhunuar.

Vajza e mitur nuk i ka treguar askujt kalvarin që ka kaluar. Një e afërme e të miturës ka parë mesazhet që 13-vjeçarja kishte shkëmbyer me 30-vjeçarin, para dhe pas përdhunimit të saj.

Nga mesazhet ajo mësoi për ngjarjen e rëndë dhe njoftoi nënën e të miturës. Ajo më pas denoncoi në Policinë e Kalkidës ngjarjen, ndërsa kanë nisur hetimet.

Policia greke është në kërkim të 30-vjeçarit, por nuk ka mundur ta lokalizojë. Sipas burimeve të EL.AS. autori mund të ketë ndërruar vendbanimin apo edhe të ketë ikur në Shqipëri, për të humbur gjurmët e tij.