Ambasadorja Yuri Kim takohet me Tabakun në Kryesinë e Kuvendit, çfarë do të diskutohet

Ambasadorja Yuri Kim ka mbërritur në Kryesinë e Kuvendit, ku do të zhvillojë një takim me deputetet Jorida Tabaku dhe Etilda Gjonaj.

Në fokus të bisedës së tyre mësohet se është çështja e integrimit të Shqipërisë në BE. Kujtojmë se sot Shqipëria pas hapjes së negociatave në korrik, ka nisur në Bruksel negocimin e grupit të kapitujve themelorë, me fokus Kapitullin 23 “Gjyqësori dhe të drejtat themelore”.

Në takime të ndara Kim bisedoi disa ditë më parë me kreun e grupit parlamentar të PS-së, Taulant Balla, si edhe kreun zyrtar të grupit parlamentar të PD-së, Enkelejd Alibeaj.

Influenca ruse në veprimtarinë e partive politike, reforma e re territoriale apo edhe amendimet në ligjin për reformën në drejtësi, mendohet të kenë qenë të fokus të bisedës së zhvilluar sot mes ambasadores amerikane dhe krerëve të grupeve parlamentare.

Takimi në kryesinë e kuvendit ndodhi një ditë pas takimeve që ambasadorja amerikane zhvilloi me kreun e KQZ-së Ilirjan Celibashi e më pas edhe me praninë e përfaqësuesve të partive politike parlamentare, ku shprehu shqetësimin e SHBA-së për influencën ruse në veprimtarinë e partive politike në Shqipëri.