Gjykata e Fierit ka rrëzuar kërkesën e Safet Bajrit. Anëtari i bandës së Shkodrës mbetet ende në burg.
Safet Bajri, ose siç njihet ndryshe si “i forti i Shkodrës” aktualisht dënimin e tij po e vuan në burgun e Fierit. Më herët, Bajri ka kërkuar që dënimin ta vuajë afër familjes, duke e gjykuar këtë si të drejtën e tij. Por pas kërkesave të përsëritura për transferimin në burgun e Reçit, të cilat nuk po konsideroheshin nga ana e drejtorit të burgut, Bajri vendos të dërgojë çështjen në Strukturën e Posaçme Anti Korrupsion, duke argumentuar dy arsyet e mësipërme. Kujtojmë se Bajri është i dënuar me 9 vite burg nga gjykatat e Belgjikës, por nuk mund të ekstradohet për shkak se dy vendet nuk kanë një marrëveshje për këtë pjesë. Gjithsesi dy vendet njohin dënimet e dhëna në vendet reciproke dhe për këtë arsye Bajri do e vuaj dënimin në Shqipëri.
Operacioni “OAZ”
Në shtator të vitit 2018 Policia e Shtetit në bashkëpunim me ish-Prokurorinë për Krime të Rënda do të trumbetonin në konferenca mediatike, goditjen e një prej grupeve më të rrezikshme kriminale që operonte në Shkodër. Në sajë të këtij operacioni policia arrestoi 11 persona, të cilët i etiketoi si persona me rrezikshmëri të lartë shoqërore. Në atë kohë Drejtori i Përgjithshëm i Policisë, Ardi Veliu, gjatë konferencës për shtyp tha se ishin shpallur në kërkim edhe dy persona të tjerë. I pari Enver Bajri, i cili u arrestua disa muaj më pas në Spanjë. Në atë kohë drejtori Ardi Veliu tha se një tjetër personazh kyç në këtë grup është edhe Behar Bajri, i arrestuar në Roterdam, pasi ishte larguar një javë përpara se të zhvillohej operacioni “OAZ”.
Pas përfundimit të operacionit “OAZ” rreth një vit e gjysmë më parë, policia tha zyrtarisht se kishte provuar akuzën e vrasjes për dy raste. E para, është vrasja e 15-vjeçares Fabiola Bajri, bashkëjetuese e njërit prej të dyshuarve. Vrasja e saj u raportua si vetëvrasje 20 vjet më parë, edhe pse e mitura ishte qëlluar me një plumb, ndërsa edhe pas të shtënave, arma u gjet me fishekë gati për qitje. Krimi i dytë dyshohet se është kryer për shkaqe banale, me të njëjtën armë që ishte ekzekutuar 15-vjeçarja. Por tashmë kur kanë kaluar gati dy vjet nga operacioni që policia e quajti nga më të suksesshmit, SPAK rrëzoi akuzën e grupit kriminal ndaj personave të lartpërmendur dhe e dërgoi dosjen në Shkodër, ku këta të fundit shuan dje masat e sigurisë ndaj tyre.
Discussion about this post