Është konfirmuar lajmi se eshtrat e gjetura në Fushë Kuqe rreth një muaj më parë i përkasin të riut Mariglen Gjonaj, i cili prej shtatë vitesh rezultonte i zhdukur. Eshtrat ishin dërguar për ekzaminim të specializuar dhe ndërkohë ishte marrë dhe ADN-ja e mamasë së djalit, ndërsa vetëm sot është konfirmuar lajmi se eshtrat i përkasin të riut i cili dyshohet se është dhunuar dhe më pas vrarë.
Edhe pse specialistët nuk janë në gjendje të përcaktojnë se cilët janë mjetet e përdorura për goditjen e viktimës, dyshimet janë se personi para se të vritej është dhunuar me sende të forta për arsye ende të paditura.
I riu rezulton i zhdukur që prej vitit 2015. Asokohe, prindërit e tij deklaronin se dikush mund t’i ketë bërë keq, pasi adoleshenti atë ditë ka pasur në dorë orë Roleks dhe disa bizhuteri që kapnin një vlerë prej 10 mijë eurove. Sipas deklaratave të familjarëve, ai ka shkuar si çdo ditë tjetër në shkollë më 18 maj. Por nuk është kthyer në orarin e zakonshëm dhe as në darkë, çka ka vënë në alarm familjen e tij. Ata kanë bërë denoncim në polici, por ende nuk ishte zbuluar asnjë e dhënë deri para një muaji ku u gjetën eshtrat e të riut.
Zhdukja e adoleshentit 16-vjeçar, Mariglen Gjonaj, është hetuar fillimisht nga prokuroria e Laçit dhe më pas çështja ka kaluar në prokurorinë e Krimeve të Rënda në Tiranë. Kjo e fundit kreu veprime për akuzën e rrëmbimit të personit, por pas shpërbërjes së Krimeve të Rënda, dosja i kaloi për hetime të mëtejshme sërish në Kurbin. Hetimet u pezulluan derisa pak kohë më parë kur u gjetën eshtrat, ndërsa nuk dihet ende shkaku i vrasjes së të riut apo autorët e dyshuar.
Discussion about this post