Presidenti i ri, Bajram Begaj ka mbërritur në Presidencë, atje ku po e pret prej orësh paraardhësi i tij, Ilir Meta. Begaj kështu bëhet gati për pjesën e dytë të ceremonisë ku zyrtarizohet marrja e detyrës si kryetar i Shtetit shqiptar. Gjatë ceremonisë, pritet të jenë mbi 500 të ftuar, mjekë përfaqësues të trupave diplomatike, komiteteve fetare, politikës etj, të cilët i janë nështruar kontrolleve të rrepta nga Garda e Republikës së Shqipërisë.
Ceremonia e dorëzimit të detyrës do të zhvillohet në 19:30. Gjatë fjalës së tij në Kuvend, si president i ri i vendit, Begaj përçoi mesazhe të qarta politike opozitës dhe qeverisë shqiptare.
“Kjo përgjegjësi vjen në një moment historik për vendin. Shqipëria ka hyrë në një rrugë të pakthyeshme europiane. Shqipëria europiane, sot premtim dhe nesër realitet është kurora e ëndrrës më të bukur të popullit shqiptar. Është testament i ardhur prej historisë dhe bekim i së ardhmes.
Unë e njoh, mbështes dhe respektoj punën e qeverisë, por përpjekja dhe dëshira nuk justifikojnë asnjë dështim. Do të dëshiroja nga opozita të mos shihet konflikti para bashkëpunimit. Periudha që po jetojmë është nga më të paparashikueshmet.”-tha Begaj.
Discussion about this post