Qeveria shqiptare është tërhequr nga vendimi për të rritur çmimin e energjisë elektrike për konsumatorët familjarë. Kryeministri Edi Rama ka lajmëruar në rrjetet sociale se nuk do të hyjë në fuqi nesër, pra më 1 tetor fasha 800 KW/H.
Përmes një video në Facebook, Rama tha se ky vendim erdhi pasi për shkak të reshjeve është rritur furnizimi me energji elektrike dhe kërkesa tanimë është ulur. Më tej, Rama shtoi se kursimi i energjisë është arma kryesore për ta kaluar këtë dimër pa kufizime energjie.
“Fasha synon që ata që e kalojnë këtë tarifë të paguajnë me çmimin real çdo kilovat të tejkaluar. Kjo është një masë e vendosur nga ne, por jo e shpikur nga ne. Në këtë mënyrë nuk mund të lejojmë që taksat e shqiptarët të marrin përsipër dhe të paguajnë këto çmime. Disa njerëz thonë që vendi ynë nuk ka lidhje me mungesën e energjisë elektrike, pasi ka kapacitet për ta plotësuar vetë konsumin. Kemi qëllim që brenda këtij 10-vjeçari ta bëjmë Shqipërinë një vend eksportues neto të energjisë. Unë dhe kjo qeveri jemi jo vetëm për të garantuar mbrojtjen e konsumatorëve po edhe për të mos lënë asgjë pa bërë që barra që ka sjellë kjo krizë energjetike të lehtësohet sa më shumë. Jam këtu për t’ju thënë se kemi një lajm pozitiv. Më 1 shtator, kur ne vendosëm fashën, kërkesa për energji ishte shumë e lartë, por tashmë është ulur. Rol të rëndësishëm ka edhe fillimi i dukshëm i qasjes së familjarëve për të kursyer energjinë. Përmirësim kemi pasur dhe në nivelin e Fierzës për shkak të reshjeve. Përmirësim pritet të ketë edhe në ditët në vijim. Kjo na bëri që të vendosim që nga 1 tetori të mos hyjë në fuqi kjo fashë”, tha Rama.
Discussion about this post