Evis Kushi ishte një nga emrat që Edi Rama vendosi ta largojë nga Qeveria me ndryshimet e fundit që janë dekretuar dhe miratuar nga Kuvendi. Kushi mbante postin e ministres së Arsimit, ndërsa u zëvendësua nga Ogerta Manastirliu, e cila më parë mbante postin e ministres së Shëndetësisë.
Ndërkohë, Kushit i është besuar posti i nënkryetares së komisionit të Edukimit dhe Mjeteve të Informimit Publik.
Gjithashtu ajo pret që Asamblea Kombëtare e PS ta votojë si pjesë të Sekretariatit të ri të kësaj partie.
Lidhur me pozicionin që do të mbajë në Komisionin Parlamentar, Kushi përmes rrjeteve sociale, shprehet se do të jetë e hapur për bashkëpunim me opozitën, sepse arsimi dhe kultura janë sektorë që duhet të bashkojnë dhe jo të ndajnë palët.
“Jam e nderuar që sot m’u besua në seancën parlamentare detyra e re si Nënkryetare e Komisionit Parlamentar të Edukimit dhe Mjeteve të Informimit Publik. Do të vazhdoj me të njëjtin përkushtim, veçanërisht misionin tonë të përbashkët në fushën e arsimit, por edhe të kulturës dhe medias, si fushat kryesore të punës së këtij komisioni, tashmë nga një tjetër front, atë të Kuvendit të Shqipërisë, por gjithmonë për të mbështetur reformat dhe nismat e duhura në interes të brezit të ri dhe gjithë shoqërisë shqiptare.
Në këtë rol të ri, bashkë me përgjegjshmërinë e lartë për të përfaqësuar sa më denjësisht qytetarët që na kanë votuar, angazhohem që dora ime do të jetë gjithmonë e shtrirë edhe për bashkëpunim me opozitën, sepse arsimi dhe kultura janë sektorë që duhet të na bashkojnë dhe jo të na ndajnë, për të marrë vendime të drejta dhe për të bërë më të mirën për të ardhmen e Shqipërisë sonë”, shkruan Kushi.
Discussion about this post