Taulant Balla në një prononcim për media si drejtues politik i Fierit, tha se ky është një post për të cilin është i nderuar që ta mbajë, pasi çdo socialist e ka ëndërr të drejtojë njëherë qarkun ku buron mbështetja më e madhe për PS-në.
Sekretari i Përgjithshëm i PS-së tha nga Fieri se i janë borxhlinj këtij qarku, duke shtuar se është privilegj të drejtojë qarkun ku ka udhëhequr një personalitet si Gramoz Ruçi për 12 vite.
“Jemi borxhlinj qarkut fier. Secili prej nesh e ka ëndërr që në një moment të karrierës së tij të jetë drejtues i politik i qarkut Fier, qarku ku PS ka më shumë detyrime se në cdo qark tjetër dhe është qarku ku buron mbështetja më e madhe për PS. Natyrshëm, është përgjegjësia më e madhe pasi i jemi borxhli qarkut Fier.
Jam i kënaqur që vij të drejtoj PS pasi atë e ka drejtuar per 12 vite me radhe personaliteti më i rendesishem i PS Gramoz Ruçi. Ruçi është i pazëvendësueshëm. Unë do mundohem të bëj më të mirën”, tha Balla.
Partia Socialiste ka ndezur motorët në qarkun e Fierit, ku gjatë ditës së sotme u bë prezantimi i drejtuesit të ri politik Taulant Balla.
