Zhvillim i papritur në skuadrën e Elbasanit. Trajneri italian i verdhebluve, Roberto Bordin, ka pasur një takim me drejtuesit e klubit mëngjesin e kësaj të enjteje, ku ka paraqitur dorëheqjen.
Tekniku italian ka deklaruar se nuk po arrin që të motivojë skuadrën për të dhënë maksimumin dhe se ka ardhur koha për një impuls të ri.
Ndonëse Elbasani mposhti Bylisin ditën e djeshme, duke rigjetur fitoren e munguar prej 8 javësh në kampionat, duket se këto 3 pikë nuk e kanë bindur Bordin, që të vazhdojë detyrën e tij në krye të stolit verdheblu.
Lidhur me këtë vendim të trajnerit Bordin ka reaguar edhe klubi i Elbasanit.
“AF Elbasani njofton publikun për shkëputjen e bashkëpunimit me trajnerin Bordin. Tekniku italian ka paraqitur dorëheqjen kështu duke u larguar nga drejtimi i ekipit. Familja verdheblu i uron suksese në vazhdim”, thuhet në njoftim.
Discussion about this post