E përplasi me makinë 27-vjeçaren dhe u largua nga vendngjarja, arrestohet shoferi

Një aksident është shënuar rreth orës 13.00 pranë Fakultetit Ekonomik këtë të diel në Tiranë. Makina përplasi 27-vjeçaren me inicialet K.S e cila ishte duke kaluar rrugën. Pasi e përplasi, autori është larguar nga vendi i ngjarjes në drejtim të paditur.

Kanë qenë kalimtarët që kanë njoftuar policinë dhe ambulancën, ku e kanë transportuar për në spital vajzën, e cila ka marrë dëmtime serioze në gjymtyrë.

Nga pyetja e dëshmitarëve okularë rezultoi se mjeti që shkaktoi aksidentin ishte një “Benz” i bardhë. Policia rrugore sekuestroi kamerat e sigurisë të zonës, ku identifikoi targën e mjetit që shkaktoi aksidentin dhe identifikoi drejtuesin e tij.

Pas vetëm pak orësh policia vuri nën pranga 24-vjeçarin, Ardjan Tujani mbi të cilin rëndojnë veprat penale shkelja e rregullave të qarkullimit rrugor dhe largim nga vendi i aksidentit.