E rëndë/ U denoncua i zhdukur, gjendet i vdekur një person në malin e fshatit Trebisht

Thuajse 10 ditë pas denoncimit të familjarëve se ishte larguar nga banesa, është gjetur pa shenja jete në malin Trebisht 85-vjeçari me inicialet R. S.

Sipas policisë, nga këqyrja e trupit të viktimës nga eksperti mjeko-ligjor, nuk janë konstatuar shenja dhune, prandaj dyshohet se vdekja ka ardhur nga shkaqe natyrale.

“Në malin e fshatit Trebisht, është gjetur pa shenja jete shtetasi R. S., 85 vjeç, i cili ka qenë i shpallur në kërkim pasi ishte larguar nga banesa, më datë 20.04.2022. Nga veprimet e kryera nga grupi hetimor dhe këqyrja e trupit të viktimës nga eksperti mjeko-ligjor, nuk janë konstatuar shenja dhune. Dyshohet se vdekja ka ardhur nga shkaqe natyrale. Materialet procedurale i kaluan Prokurorisë pranë Gjykatës së Shkallës së Parë Dibër dhe Prokurorisë pranë Gjykatës së Shkallës së Parë Mat, për veprime të mëtejshme”, njofton policia.