E vranë dhe e groposën, jepet vendimi për babain dhe vëllain e Eglantina Bucit

Faik dhe Shkëlzen Buci babë e bir që vranë mizorisht 10 vite më parë Eglantina Bucin janë dënuar me 50 vite burg. Përkatësisht, dënimi është dhënë me 25 vite burg për babanë e Eglantinës, Faikun dhe 25 të tjera për të vëllanë Shkëlzenin për veprën penale vrasje me paramendim, e kryer në bashkëpunim. Eglantina Buci u ekzekutua nga vëllai i saj në malin me Gropa në Tiranë. Familja nuk e pranonte faktin që vajza ishte larguar nga shtëpia dhe bashkëjetonte në zonën e Freskut.  Pak ditë më parë është zbardhur dhe dëshmia e motrës së viktimës, Elonës. Ajo ka thënë në dëshminë e saj se babi i tyre i ka dhunuar duke i rrahur me kabllo dritash dhe të dyja motrat si dhe nëna e tyre janë larguar nga shtëpia për shkak të dhunës.

Ngjarja

Më 13 shtator të vitit 2012 në Malin me Gropa u gjetën nga një gjuetar një pjesë e eshtrave të Eglantina Bucit. Pas gjetjes, eshtrat iu nënshtruan ekspertizës nga ku rezultoi se viktima ishte vrarë të paktën 6 muaj përpara se të gjendeshin eshtrat e saj. Pak ditë më pas policia shkoi sërish në vendin ku gjetën eshtrat. Megjithatë shkaqet dhe autorët e vrasjes asokohe mbetën mister. Ka qenë Shkëlzen Buci ai i cili ka vrarë motrën e tij. Ai fillimisht i ka thënë Eglantinës të shkonin për kafe dhe pasi e ka marrë me makinë ka shkuar në drejtim të Malit me Gropa, ku dhe e ka qëlluar viktimën me një plumb që i ka shkaktuar menjëherë vdekjen. Më pas e ka groposur trupin e pajetë të Eglantinës në Malin me Gropa. Së bashku me Eglantina dhe Shkëlzen Bucin në makinë ka qenë dhe shoku i këtij të fundit. Dëshmia e shokut të Shkëlzen Bucit, M.T. 8 vite pas vrasjes së 23-vjeçares ka bërë të mundur zbardhjen e krimit dhe identifikim e autorëve. Bashkëpunëtori i drejtësisë ka treguar se atij i ishte thënë nga Faik dhe Shkëlzen Buci që të kontaktonte me Eglantinën, duke qenë se viktima i kishte humbur kontaktet me familjen. “Në momentin që morëm rrugën për në Malin me Gropa, Eglantina e kuptoi se diçka nuk shkonte dhe filloi të shqetësohej. Kur shkuam aty ai e qëlloi atë me një plumb në kokë. Më pas ka marrë babin Faikun dhe i ka thënë se ajo punë u mbyll”, ka thënë në dëshminë e tij 2 vite më parë M.T. Shkëlzen Buci u arrestua në vitin 2017 në Tiranë për një plagosje, ndërsa babai i tij ra në pranga në vitin 2020 pasi u zbulua ngjarja. A.L/ Gijotina.com