Shkrimtari Agron Tufa ka kritikuar ashpër qëndrimin e opozitës, e cila firmosi për kandidaturën e Endrit Shabanit për Avokat të Popullit.
Përmes një statusi në faqen e tij në Facebook, Tufa thotë se opozita duhet të kishte mbështetur një kandidaturë nga shtresa e ish-të përndjekurve politikë në këtë proces.
Statusi i Tufës
Edhe ti, o Alizot?
Tani nuk kemi më iluzione… të paktën politike. S’ka gjë se na kanë përdorur për llosha. Por, qëkur thashë: “Mbyllni qepenat e opozitarizmit!”, këtë marrëdhënie flligështie kisha parasysh, si me listat për Avokatin e Popullit. I sheh emrat dhe firmat dhe s’të besohet. I sheh prapë – dhe një horizont i larmishëm sharjesh të vjen në gojë. I sheh për herë të tretë dhe… e dini vetë.
U tha e u përfol se opozita do të propozonte një kandidat nga shtresa e ish-të përndjekurve. Por jo, jo… Janë të thella këto punë në këtë tokë të lashtë. Veçse firma e z. Tomorr Alizoti, ma shpifi krejt, për Zotin. Zot, o Zot, edhe ti o Alizot? Atëherë… varja, varja…
Ngushëllim që nuk e pashë aty firmën e Agron Shehajt.
Po si vallë, me këto flligështi do ta mundni Ramën!?
Ja pse nuk e mundni: ju mungon një gjë shumë e madhe, që ju nuk e përfillni dhe mbase nuk e keni si të dhënë ndërndijore dhe prag vetëdije: sinqeriteti dhe dinjiteti. Dhe tash u bë një dekadë e gjysmë, që po vuani borxhin e hipokrizisë së gjatë. E djathta, me ç’duket, ju duket djathë, por ju po hani sapun, zotërinj….
P.S: Është i parashikuar me atë horizontin e larmishëm të sharjeve kushdo që guxon ta çojë, qoftë dhe nëpër mend, atë fjalën e dalëboje “opozitë e opozitës”.
Discussion about this post