Kriza energjetike po sjell efektet e para te konsumatorët. Së fundmi, Bashkia e Fierit ka njoftuar se do të nisë kufizimin e furnizimit me ujë për qytetarët e zonës për të kursyer energji elektrike.
Bashkia Fier i bën thirrje qytetarëve që të nisin kursimin e energjisë elektrike, në mënyrë që të mos ketë rritje çmimi për ujin. Ndër të tjera, Bashkia shpreson që për këtë masë të gjejë mirëkuptimin e qytetarëve deri në kalimin e situatës ku ndodhemi aktualisht.
“Të nderuar qytetarë! Jemi duke përjetuar një situatë të vështirë energjetike, e cila ka përfshirë të gjithë rajonin. Kjo situatë na prek të gjithëve. Secili prej nesh duhet të limitojë konsumin e energjisë në punë e familje, pasi çdo kë i kursyer vlen në këtë kohë. Për ketë arsye edhe Ujësjellës Kanalizime Fier, në bazë të një plani të mirëmenduar dhe të mirëstudiuar, për të kursyer energji, por edhe për të mos rritur çmimin e ujit si efekt të krizës energjetike do të nisë aplikimin e kufizimit e furnizimit me ujë deri në përmirësimin e situatës. Shpresojmë në mirëkuptimin tuaj, gjithashtu edhe që kjo situatë të kalojë sa më shpejt. Faleminderit!”, njofton Bashkia.
Discussion about this post