Trajneri Edlir Tetova do të largohet nga skuadra e Egnatias në fundin e këtij sezoni. Klubi rrogozhinas ka njoftuar një konferencë për ditën e nesërme, duke u shprehur se trajneri Tetova ka diçka me shumë rëndësi për të ndarë me publikun. Mësohet se trajneri do njoftojë largimin e tij pas tre vitesh në krye të Egnatias, ndërsa RTSH Sport shkon më tej duke thënë se me shumë gjasë 43-vjeçari do rikthehet në vendlindje dhe nga sezoni i ri do drejtojë klubin e Teutës së Durrësit.
Edlir Tetova u ul për herë në parë në stolin e Egnatias për tre muaj në vitin 2022, për t’u rikthyer më pas në fillimin e vitit 2023 si drejtor sportiv, para se më 27 janar të emërohej si trajneri i ekipit. Gjatë kësaj kohe ai e ka drejtuar ekipin në 156 ndeshje, duke fituar pesë trofe.
Egnatia nën drejtimin e tij ka fituar dy herë kampionatin shqiptar, dy herë Kupën e Shqipërisë dhe një herë Superkupën. Ekipi është në lojë që këtë sezon të jetë pjesë e ‘Final 4’ dhe të garojë për trofeun, i cili do ishte si ‘qershia mbi tortë’ për largimin e Tetovës.
Kujtojmë që trajneri Tetova aktualisht është i dënuar me 6 muaj nga Komisioni i Disiplinës në FSHF dhe nuk e drejton ekipin gjatë ndeshjeve.
Discussion about this post