Ramazan Mataj, 33-vjeçari shkodran që u vra pak ditë më parë në fshatin Dragoç të Postribës, u nxor në pritë nga autori, i cili ishte vëllai i të dashurës së tij.
Arjon Hasaj duke qenë në dijeni të lidhjes së tyre por edhe i shqetësuar nga ngacmimet e vazhdueshme dhe problemet që kjo lidhje jashtëmartesore i kishte shkaktuar motrës së tij, vendosi ta nxirrte në pritë.
Më 25 dhjetor, ai ka krijuar një profil fals në rrjetet sociale, duke komunikuar me Ramazanin. Ai e ka thirrur dy tre ditë para ngjarjes 33-vjeçarin, por vrasja nuk është kryer pasi nuk ishin gati. Biseda e fundit ka qenë ditën e ngjarjes me fjalët, ‘unë do shkoj te tezja dhe do dal të takoj në filan rrugicë’.
Pasi autori është siguruar se Ramazani do vinte i vetëm në takim, ka marrë armën dhe e ka qëlluar disa herë duke i marrë jetën brenda në makinë.
Kur është zbërthyer telefoni i viktimës janë gjetur komunikimet e tij me autorin që kishte krijuar profilin e rremë, por edhe me vajza të tjera. Edhe pse prej disa vitesh ishte i lidhur me vajzën e familjes Hasaj, 33-vjeçari nuk pranonte të martohej me të dhe nuk e konsideronte serioze marrëdhënien e tyre.
Ai madje dyshohet se ka ngacmuar edhe vajza të tjera të familjes Hasaj dhe kjo është arsyeja pse Arjoni ka ndërmarrë aktin e rëndë.
Discussion about this post