Një lëvizje e fortë në qeveri pritet të ndodhë brenda pak ditësh, ku mësohet se “koka e prerë” do të jetë Arben Ahmetaj, pasi Rama ka vendosur ta zëvendësojë me Ditmir Bushatin, marrëdhënia me të cilin është karakterizuar nga përplasje të forta ndër vite.
Ky ndryshim pritet të vijë në kuadër të një procesi të riorganizimi që po i nënshtrohet Partia Socialiste, që do të prekë edhe shumë segmente të qeverisë “Rama 3”, duke larguar disa nga figurat më të rëndësishme në PS dhe rikthimin e emrave të vjetër.
Megjithëse ende e pakonfirmuar zyrtarisht, ashtu si edhe dy ministret e përfolura një ditë më parë, kjo lëvizje e Ramës mund të konsiderohet si surprizë, pasi Ahmetaj ka mbajtur pozicione kyçe në qeveri që në vitin 2013, ndërsa së fundmi mban postin e zv.kryeministrit. Gjithashtu, i bujshëm është lajmi për një rikthim të mundshëm të ish-ministrit të Jashtëm, Ditmir Bushatit, i cili ka pasur përplasje të forta me Ramën ku kulmi arriti në momentin që ish-ministri u la jashtë listave të 25 prillit.
Asokohe, Rama tha se Bushati nuk kishte punuar sa duhet për vendin pasi u shkarkua si drejtues politik për qarkun e Shkodrës ku bëri zëvendësim e tij me Valdrin Pjetrin, që njihej si njeri i afërt me Tom Doshin.
Që nga ky moment, kritikat për Ramën, nuk kanë munguar, ku në mbledhjet e Kryesisë, Bushati i ka bërë vazhdimisht thirrje kryeministrit që të mos pranojë njerëz të inkriminuar në parti. Por pavarësisht debateve, Bushati ka qenë gjithmonë i pranishëm në eventet e rëndësishme të PS.
Por tashmë duket se ka një qetësim të ujërave mes Ramës e Bushatit, ku ky i fundit pritet të jetë numri dy i qeverisë, ndërsa “tigri” i qeverisë, mund të marrë drejtimin e Financave pas largimit të ministres aktuale.
Rikthimi i Bushatit është përgatitur prej kohësh ku duket se Rama dhe ish-ministri i kanë sheshuar përplasjet, pasi para 6 marsit kur Rama ishte në Durrës dhe Dibër për të prezantuar nismën e tij të Këshillimit Kombëtar, e shoqëronte ish-ministri.
Këto ndryshime, pritet të ndodhin para Kongresit të 9 prillit që do të mbajë PS, edhe pse nisur nga natyra mediatike e Ramës që politikën e konsideron si spektakël dhe veten showman, këto ndryshime mund të faktohen ditën e Kongresit, ku pritet të ketë shumë fytyra të mërzitura në radhët e socialistëve. /D. Lami/Gijotina.com
Discussion about this post