Pas më shumë se dy javësh në agoni, Lulzim Basha do të japë dorëheqjen nga posti i kreut të Partisë Demokratike, 9 vite pasi mori në dorëzim partinë më të madhe opozitare në vend, dhe që pas 2013, e la sërish në opozitë pa i siguruar asnjë fitore.
Burime për Gijotina.com bëjnë me dije se ky vendim i Bashës vjen pas presionit të vazhdueshëm nga deputetët e opozitës, të cilët i dolën të gjithë kundër pas humbjen tronditëse të 6 marsit.
Ky vendim pritet të jepet ditën e nesërme pasi fillimisht do t’ia komunikojë grupit parlamentar të PD pasditen e sotme, ndërsa nesër ai të njëjtin vendim do ta ndajë me të gjithë Shqipërinë.
Prej dy javësh, ai ka kërkuar kohë, duke negociuar me deputetët e opozitës që të mos merrnin vendim për përjashtimin e tij nga grupi parlamentar, vendim i cili është artikuluar disa herë nga deputetë të ndryshëm, madje edhe në nivele drejtuese të Partisë Demokratike.
Ndonëse karrierën politike e nisi me premisa të mëdha, duket se fundi politik i Lulzim Bashës nisi në momentin që vendosi të përjashtojë Sali Berishën nga grupi parlamentar i PD, duke mos e ditur që në të vërtetë po i “bënte gropën vetes”.
Që pas përjashtimit të Berishës, mbështetja e Bashës në bazë u reduktua ndjeshëm, ku ndonëse dukej se shumicën dërrmuese të deputetëve e kishte pro, pas humbjes në 6 mars, mbeti i vetëm.
Këtë herë Bashës nuk i qëndroi afër as ambasadorja Yuri Kim e cila dukej se po bënte “tifo” fuqishëm pas largimit të Berishës, por pas 6 marsit, askush nuk i qëndroi pranë, ndërsa e nesërmja ka për të qenë beteja e vërtetë e jetës së tij. /D.L/Gijotina.com
Discussion about this post