Pas mijëra tërmeteve që janë regjistruar në ishullin grek të Santorinit, duket se aktiviteti sizmik është drejt normalizimit.
Sipas sizmologëve që kanë monitoruar aktivitetin në ishull, situata po përmirësohet.
“Në fazën aktuale, 19 ditë pas fillimit të aktivitetit, besojmë se aktiviteti sizmik po zvogëlohet gradualisht, tërmetet kanë përmasa më të vogla dhe janë më të rralla. Dhe sigurisht që nuk ka asnjë lidhje midis aktivitetit vullkanik dhe aktivitetit sizmik. Besojmë se fenomenet do të vazhdojnë për një periudhë të shkurtër kohore dhe do të kthehen në nivele normale”, thotë sizmiologu Efthimios Lekas.
Profesori i gjeologjisë Efthimios Lekas, i cili është gjithashtu kreu i Organizatës së Planifikimit dhe Mbrojtjes nga Tërmeti të Greqisë thotë se nuk ka asnjë shans për një shpërthim vullkanik.
“Nuk ka asnjë shans për një shpërthim të vullkanit. Që vullkani të shpërthejë duhen disa vite”.
Sizmologë të tjerë ndodhen në ishullin vullkanik të Nea Kamenit.
Ata pritet të masin ndikimin e aktivitetit sizmik të fundit në ishullin e vogël, të pabanuar, pjesë e zinxhirit të ishujve të Santorinit të krijuar nga vullkanet.
Shpërthimi i fundit në Nea Kameni ndodhi në vitin 1950. Vullkani ende konsiderohet aktiv, së bashku me Kolumbon.
Nea Kameni është një atraksion turistik, i vizituar me varka gjatë verës dhe vizitorët në përgjithësi këshillohen të mos hyjnë për shkak të rrezikut të rënies së shkëmbinjve.
Discussion about this post