Mjeku Ilir Alimehmeti ka publikuar një shkrim që kanë bërë mediat polake, në lidhje me kontradiktat mes qeverisë si dhe ekspertëve mjekësor në lidhje me Covid. Me anë të një postimi në Facebook, Alimehmeti shkruan se këtë lloj marrëdhënie mes ekspertëve si dhe politikanëve e ka shumica e shteteve.
Në shkrimin e Lancet shkruhet se shumica e eksperteve të Këshillit Mjekësor për Covid dhanë dorëheqjen për shkak se sugjerimet e tyre mbi Covid nuk po merreshin parasysh.
Postimi i Plotë:
Miqtë e mi, më poshtë mund të gjeni të përmbledhur marrëdhënien ndërmjet ekspertëve dhe politikanëve në një prej shteteve të Bashkimit Europian, Poloninë. Këtë lloj marrëdhënie jofunksionale e ka shumica dërrmuese e shteteve, por rrallëherë paraqitet në literaturën mjekësore, kurse në media paraqitet sipas humorit dhe marrëdhënies së tyre me partitë përkatëse. Më poshtë mund të gjeni në një grimcë shkrimi publikimin në prestigjiozen Lancet të dorëheqjes së treçerekut të anëtarëve të Këshillit Mjekësor COVID-19 në Poloni.
Shumica e Organit Këshillimor Mjekësor mbi COVID-19 në Poloni ka dhënë dorëheqjen, duke deklaruar se këshillat e tyre janë injoruar. 13 ndër 17 anëtarë u dorëhoqën më 14 janar 2022 duke dhënë arsyetime si:
“…toleranca ndaj mohimit të COVID-19 dhe e rëndësisë së vaksinimit kundër pandemisë… që vërehet në deklaratat e qeverisë dhe të zyrtarëve…”
“…diskrepanca e sjelljes së qeverisë me gjykimin dhe praktikën shkencore dhe mjekësore…”
“…mungesa e përforcimit/zbatimit të masave nga ana e organeve qeveritare…”
Të dhënat mbi pandeminë në Poloni:
Polonia është ndër shtetet me vdekshmërinë më të lartë nga COVID-19 në botë.
Niveli i vaksinimit është 56% (përditësuar më 18 janar 2022).
1 ndër 3 persona 18-65 vjeç deklaron se nuk do të vaksinohet kurrë kundër COVID-19.
Hezitimi dhe mosrespektimi i masave është veçanërisht i lartë në zonat rurale, ku partia në fuqi (Laë and Justice) ka mbështetjen kryesore elektorale.
Dr Robert Flisiak, Presidenti i Shoqatës Polake të Epidemiologëve dhe të Infeksionistëve, u shpreh:
“:..marrëdhënia ndërmjet Këshillit Mjekësor dhe qeverisë ka qenë i shkëlqyer deri në mesin e 2021, kur filloi të ngadalësohej vaksinimin në Poloni në mes të një ndjenje në rritje anti-vaksinim…”
“Qeveria u duk se mori një qasje “të shohim e të bëjmë” dhe ishte kundra marrjes së masave jopopullore.”
“…politikanët nuk donin të humbnin mbështetjen e votuesve, duke simpatizuar lëvizjet anti-vaksinim ose duke u përfshirë aktivisht në to…”
Pas dorëheqjes, qeveria deklaroi:
“Është roli i qeverisë që të marrë vendime bazuar mbi pozicionet e ndryshme të ekspertëve si: Këshilli Mjekësor, ekonomistët, ekspertët e fushave të tjera të prekura nga epidemia.”
Mjekë të palidhur me Këshillin Mjekësor janë shprehur se reagimi i qeverisë ndaj dorëheqjeve ishte shqetësues.
Dr. Krzysztof Filipiak, Zv. Rektori i Universitetit Mjekësor të Varshavës, u shpreh se kjo deklaratë sugjeron se:
“…qeveria e djathtë e Polonisë ka pranuar nivel jashtëzakonisht të lartë vdekshmërie dhe nuk dëshiron të ndryshojë asgjë.”
Qeveria po mundohet të themelojë një tjetër Këshill Mjekësor.
Por anëtarët e dorëhequr kanë dyshime e tyre se edhe zëvendësuesit nuk do të kenë sukses në ndikimin e vendimeve politike.
Në këtë drejtim, Prof. Anna Piekarska, Departementi i Sëmundjeve Infektive dhe Hepatologjisë, Universiteti Mjekësor i Lodz, u shpreh:
“…Nëse zëvendësuesit rekomandojnë atë çka qeveria dëshiron të dëgjojë, qeveria nuk do ta ketë aspak problem, por asgjë nuk do të ndryshojë.”
Discussion about this post