Eksperti i ekonomisë, Zef Preçi tha gjatë një interviste televizive se ekonomia muajt në vijim do të ndjekë një rritje në ritme shumë të ngadaltë. Sipas tij shifrat e publikuara nga qeveria nuk duhen marrë me pozitivitet të lartë sepse kjo rritje pritej pas pandemisë, duke qenë se eci shumë sektori i eksporteve, por në muajt e ardhshëm edhe ky sektor do të bjerë dhe ritmi i rritjes do të ngadalësohet. Sipas tij, emigrimi i vazhdueshëm do të dobësoje sektorët më të mirë në vend atë të bujqësisë dhe ai i ndërtimit.
“Në tremujorin e tretë ruhet një pjesë e tendencës nga tremujori i dytë prej konsumit dhe prurjeve të emigracionit por rikthehet më pas një trend normal me ecuri anemike me rritje të ngadaltë. Varja e shpresës së qeverisë te fondet e rindërtimit është jo realiste dhe ka të bëjë vetëm me efekte të përkohshme dhe me ndikim në një sektor.
Nëse bujqësia është në rënie ku pjesa më e madhe e popullsisë është e vendosur atë të shtyn të mendosh se ka një impakt të mbiçmuar momental që lidhet me dobësitë e institucioneve që lidhet me pozicionin gjeografik të Shqipërisë si vend tranzit jo vetëm burim i drogave të buta dhe njëkohësisht me kuadrin ligjor që nuk kontrollon sa duhet pastrimin e parave kryesisht në sektorët e ndërtimit”, tha ai.
Sipas Preçit, ekonomia do të vazhdojë të ndjejë pasojat e pandemisë dhe qeveria duhet të fokusohet të shtyllat kryesore të zhvillimit ekonomik, bujqësia e turizmi.
“Duhet pranuar që rritja ekonomike lidhet me degët bazë të ekonomisë tregti, transport bujqësi dhe nëse shkojnë në negative duhet parë faktorët. Ka shumë vite që në ekonominë tonë kombëtare janë identifikuar si turizmi ashtu edhe bujqësia si potencialet zhvillimore si për fuqinë punëtore ashtu edhe për të rritur fuqinë eksportuese të ekonomisë dhe kontributin e saj. Është koha të analizohen investimet e kryera në turizëm për të kaluar në turizëm në të gjitha forma e të ketë shtrirje gjithëvjetore dhe politika fiskale që e mbështesin”, sipas ekspertit.
Preçi shton se, burimet natyrore të trashëguara vazhdojnë të japin një kontribut të vogël në ekonomi dhe do ishte më mirë të qëndronin në vend, sesa të eksportoheshin jashtë.
