Eksperti i ekonomisë Majlind Lazimi, deklaroi sot gjatë një interviste televizive se, kriza energjetike në vendin tonë do të shmangej nëse qeveria do të ecte me planifikime në këtë sektor.
Sipas tij nuk janë shfrytëzuar si duhet burimet, sepse kur kishim kapacitete të larta në energji, qeveria e eksportonte pa kritere dhe tani detyrohemi ta blejmë me çmime tepër të larta.
“Kjo krizë mund të shmangej nëse do të kishim planifikim më të qartë, më të saktë përsa i përket prurjeve. Do të kishte pasur një menaxhim të mirë në kohë.
Ajo çfarë po ndodh në tregjet globale të energjisë është fakti që kemi pasur disbalancë mes kërkesës dhe ofertës. Kemi tre faktorë, e para është klimaterik, e dyta ka të bëj me elementin ekonomik, dhe faktori gjeopolitik. Të gjitha këto bashkë japin një kontekst të brishtë ekonomik. Ne kemi një model të ndryshëm të burimeve energjetike, pra jemi të varur 97% të prodhimit nga energjitë e rinovueshme hidrike. Paradoksalisht kemi pasur një 6 mujor të mirë të prodhimit të energjisë elektrike. Por kur kemi pasur tepricë energjetike kemi eksportuar, dhe tani jemi përballë faktit se s’kemi energji elektrike për të mbuluar konsumin e brendshëm”, tha ai.
