Sistemi bonus-malus për sigurimin e mjeteve, që ka hyrë në fuqi këtë verë, nuk ka nisur të zbatohet dhe të dhënat e deri më tanishme tregojnë që ka shumë shanse të mbetet i papërfillshëm nga shoferët që duhet të sigurojnë makinën e tyre. Eksperti I legjislacionin të sigurimeve Ilirjan Mulgeci thotë se shkak është përcaktimi në ligj që ua lë në dorë kompanive nëse ta aplikojnë apo jo. Ai tregon se efektet e tij nuk kanë nisur ende të ndihen në treg dhe shkak për këtë është bërë organizimi jo i duhur.
Në ligjin e mëparshëm theksohej se shoqëritë duhet ta përdorin sistemin bonus-malus, duke lënë në përjashtim e dy kategorive. Por, këtë herë qeveria ka vendosur që aplikimi apo jo i këtij sistemi të lihet në dorë të shoqërive të sigurimit. Konkretisht në relacion thuhet se kompanitë e sigurimit mund të përdorin sistemin bonus-malus, por ky nuk është një detyrim ligjor. “Shoqëria e sigurimit mund të përfshijë sistemin bonus-malus në përcaktimin e tarifave të primeve të sigurimit të përgjegjësisë së të siguruarit për dëmet shkaktuar palëve të treta nga përdorimi i këtij mjeti motorik jo të detyruar, me përjashtim të policës kufitare dhe kartonit jeshil”, thuhet në relacion. Sistemi bonus-malus është një sistem i cili rregullon nivelin e primit të sigurimit të automjetit, bazuar në historinë e kërkesave të të siguruarit.
Rëndësia e këtij sistemi është se nga bonusi do të përfitojnë shoferët e mirë dhe të disiplinuar dhe ata që janë të kujdesshëm në trafik, pra duke ulur primet e sigurimit për ta, dhe në të njëjtën kohë nëpërmjet Malusit shoferët e papërgjegjshëm që shkaktojnë aksidente do të jenë në disavantazh. Projektligji gjithashtu propozon një tavan për komisionet e ndërmjetësimit të agjentëve në 12% të primit të shkruar bruto. Komisionet e ndërmjetësimit aktualisht arrijnë nivel shumë më të lartë, ndonjëherë edhe më shumë se 20%. Komisionet e agjentëve janë një nga mekanizmat kryesorë me të cilin kompanitë e sigurimeve konkurrojnë me njëra-tjetrën në shitjen e TPL-ve.
Discussion about this post