Ekspertja e ekonomisë Romina Radonshiqi ka deklaruar ditën e sotme se normat e interesit për kredi në vendin tonë janë shumë herë më të larta, se ato të vendeve të BE.
Sipas saj shlyerjet e kredisë nga qytetarët janë pothuajse të pamundura për shkak se të ardhurat në vendin tonë janë shumë më të ulëta, por normat e interesit janë në stratosferë. Sakaq, ajo vuri në dukje se më shumë abuzojnë institucionet jobanka, pasi japin kredi pa shumë kontrolle dhe më pas aplikojnë normë interesi më të lartë se bankat e nivelit të dytë
“Referuar të dhënave zyrtare në shtetin italian, paga mesatare bruto e një shtetasi italian është 2200 euro në muaj. Ndërkohë në Shqipëri është 468 Euro në muaj. Sipas Bankës Botërore për vitin 2020 interesi huadhënieve për shtetin italian është diku tek 2.3%, ndërsa për shtetin shqiptar është 6.1%. Që do të thotë edhe pse shqiptarët paguhen pesë herë më pak se shtetasit italianë, ata kanë një kosto më të lartë kredie. Problematika thellohet akoma më tepër nëse i referohemi sektorit të mikrofinancave ku interesat e kredisë shkojnë edhe mbi 40%. Ky është një interes i papërballueshëm për shqiptarët, pasi kështu kalojnë në kushtet e mbijetesës”, tha ekspertja e ekonomisë, Romina Radonshiqi.
Sipas saj, të marrësh një kredi tek sektori i mikrofinanacave, interesi që duhet të paguajë konsumatori është i njëjtë me ato me fajdeve. Kur interesi është tepër i lartë automatikisht krijohet dhe një barrë e madhe borxhi, për pasojë shqiptarët varfërohen.
“Shqiptarët janë kredimarrës të këqinj sidomos për kreditë konsumatore, të cilat nuk kanë një kolateral ndaj dhe për këtë arsye interesat e kredive në kreditë konsumatore kanë nivel më të lartë interesi se sa kreditë hipotekore”, shtoi Radonshiqi.
Ndërsa kërkoi më shumë kontrolle nga Banka e Shqipërisë.
