Deputeti socialist i Fierit, Petro Koçi ka vijuar me deklaratat lidhur me veprimtarinë kriminale në këtë qytet, ndërsa shprehet se figura të krimit të rëndë po përfitojnë para nga buxhetet publike. Koçi, në një intervistë për mediat, u shpreh se shumica e anëtarësisë së PS ka mbështetur denoncimet dhe qëndrimet e tij, ndërsa mohon përplasjet me strukturat e PS apo kreun e Grupit Parlamentar, taulant Balla.
“Institucionet të vijojnë punën të mbështesim drejtësinë e re. Në një teren si Fieri ku ka veprimtari kriminale dhe ka faktorë që pastrojnë para nga figura të krimit të rëndë të cilat janë shqetësuese aktualisht për drogën. Këtë financë që kanë krijuar nga ky lloj krimi e kanë kthyer për të bërë biznes ilegal duke krijuar për të përfituar edhe nga buxhetet publike. Veprimtari e kamufluar por që edhe përfshin zyrtarë të shteti. Ne të gjithë si shoqëri duhet të jemi më aktivë në qëndrimet dhe në rezistencën ndaj krimit, mos lejojmë zyrtarë të caktuar që të bashkëpunojnë me elementë kriminalë. Ky është një fenomen shoqëror dhe të nxisim shoqërinë për të denoncuar raste të tilla” – është shprehur Koçi.
Deputeti i PS citoi fjalën e kryeministrit kur u pyet për dy deputetët socialistë të përfolur se do të shpallen “Non Grata” nga Amerika. Ai gjithashtu tha se PS nuk do të bëhet mburojë e askujt që ka probleme me drejtësinë dhe automatikisht do të përjashtohet deri sa të dalë vendimi përfundimtar i Gjykatës.
“Kush ka probleme me drejtësinë duhet ta përballojë vetë, PS nuk është mburojë e këtyre individëve deri sa të mbarojë proceset gjyqësore. Nëse dalin fajtor ata do të përjashtohen, nëse jo ata rikthehen në anëtarësinë e PS”- tha ai.
Kjo është e disata herë që deputeti i PS hedh akuza për korrupsion dhe lidhje me krimin, ndaj eksponentëve të PS në qarkun e Fierit.
