Gjykata e Lartë Federale e Brazilit ka rrëzuar kërkesën e Ervin Matës për t’u liruar nga arresti gjatë procesit të ekstradimit, duke lënë në fuqi masën e arrestit parandalues. Vendimi është marrë më 21 korrik nga ministri Alexandre de Moraes, relator i çështjes së ekstradimit të kërkuar nga autoritetet shqiptare.
Shqipëria kërkon ekstradimin e Matës për ta proceduar penalisht për akuzat e trafikut të lëndëve narkotike, pjesëmarrjes në organizatë kriminale dhe grup të strukturuar kriminal. Sipas dokumenteve gjyqësore, masa e arrestit parandalues ishte caktuar më 11 mars 2025, ndërsa arrestimi i tij nga Policia Federale e Brazilit u ekzekutua më 25 prill 2026.
Mbrojtja argumentoi se autoritetet shqiptare nuk kishin respektuar afatet ligjore për formalizimin e kërkesës për ekstradim dhe kërkoi zëvendësimin e arrestit me masa të tjera sigurie. Megjithatë, Gjykata e Lartë braziliane i hodhi poshtë këto pretendime, duke vlerësuar se Shqipëria kishte dorëzuar dokumentacionin e nevojshëm dhe kishte ndjekur procedurat përkatëse përmes autoriteteve diplomatike.
Në vendim thuhet se arresti parandalues është i domosdoshëm për të garantuar praninë e personit të kërkuar gjatë procedurës së ekstradimit dhe se nuk ekzistojnë rrethana të jashtëzakonshme që justifikojnë lirimin e tij. Për pasojë, Gjykata vendosi të rrëzojë kërkesën për heqjen e arrestit, të mos e zëvendësojë atë me masa të tjera sigurie dhe të mos pranojë kërkesat e tjera të mbrojtjes.
Me këtë vendim, Ervin Mata do të vijojë të qëndrojë në arrest në Brazil, ndërsa autoritetet gjyqësore vazhdojnë shqyrtimin e kërkesës së Shqipërisë për ekstradimin e tij. Gjykata sqaroi se vendimi lidhet vetëm me masën e sigurisë gjatë procedurës së ekstradimit dhe nuk përbën një vendim mbi fajësinë ose pafajësinë e tij.
gijotina.com/
Discussion about this post