Një ditë pas vrasjes së Bledar Muçës në lokalin e tij në qendër të Lushnjës forcat RENEA kanë zbarkuar në tre qytete për të bërë të mundur kapjen e autorëve. Konkretisht kontrolle janë duke u zhvilluar në Durrës, Lezhë dhe Shkodër.
Dhjetëra persona me precedentë penale janë shoqëruar, ndërkohë që mes tyre është edhe Astrit Seferi. Ky i fundit nuk është një person i panjohur për policinë, pasi është autor i plagosjes së katërfishtë në Tiranë në vitin 2017. Mësohet se Seferi është ndaluar nga policia në Laç.
Në Durrës, kontrollet janë shtrirë kryesisht në Shkëmbin e Kavajës, pasi dyshimet janë se ata kamuflohen si pushues për të mos tërhequr vëmendje.
Pritet që të tjera detaje të dalin në dritë nga operacioni në fjalë, që është nën gjurmimin e personave me rrezikshmëri të lartë shoqërore, atyre që lëvizin të armatosur, apo dhe të dyshuarve apo autorëve të ngjarjeve kriminale.
Ndërsa në qarkun Lezhë nga shërbimet e DVP Lezhë dhe Komisariateve në varësi, në mbështetjen e forcave speciale RENEA po ushtrojnë kontrolle në ato ambiente apo lokale ku dyshohet se frekuentohet nga persona në kërkim, persona që mbajnë armë zjarri, lëndë narkotike apo që janë autorë veprash penale. Deri tani janë shoqëruar disa shtetas për verifikim.
