Alban Semaku është vrarë për larje hesapesh, kjo është pista në të cilën po heton policia në lidhje me këtë ngjarje. Ai njihej dhe me emrin Elton Mermali, një ish-anëtar i bandës së Aldo Bares. Identifikimi i autorëve është i vështirë për grupin hetimor, kjo për shkak të mënyrës se si është vrarë 38-vjeçari.
Burimet bëjnë me dije se Semakut mund t’i jetë ngritur kurth nga të njohurit e tij, pasi ai është ekzekutuar në diku tjetër e më pas është hedhur në vendin ku u gjet. Ai dyshohet se është vrarë disa orë para se të gjendej, por konkretisht nuk dihet vendi se ku kanë vepruar autorët. Policia ka mbledhur provat materiale në vendngjarje, gjithashtu janë sekuestruar kamerat e sigurisë në një numër të madh biznesesh. Familjarët e tij kanë dhënë në polici të gjithë informacionin e nevojshëm, madje dhe për kontaktet e fundit të 38-vjeçarit.
Në vitin 1998, kur ishte fare i ri në moshë, Mermali dyshohet se është autor i një vrasje të dyfishtë. Së bashku me dy miq të tij, kanë ekzekutuar Artan Sulçen dhe Bledar Haxhiun. Ekzekutimi i tyre u bë për shkak se Haxhiu nuk e kishte mbajtur fjalën ndaj kokës së grupit, Aldo Bares, ku i kishte premtuar se do i sillte të gjallë armikun e tij, Artur Dajën. Më 23 tetor 1998,Bledar Haxhiu u vra nga njerëzit e Bares, por viktima e 23 viteve më parë, rezulton se është i afërm i të shumëkërkuarit Laert Haxhiu.
Pra ky konflikt i hershëm, shtyn policinë të mendojë se kemi të bëjmë me hakmarrje, pikërisht në lidhje me ekzekutimet e asaj periudhe.
