Klubi i Elbasani ka reaguar në lidhje me kaosin që përfshiu përfundimin e sfidës mbrëmjen e djeshme përballë Vllaznisë. Ndeshja përfundoi me shifrat 1-1, por “spektakli” i vërtetë nisi pas duelit në fushë.
Ndërsa klubi “verdheblu” mohon që ndonjë pjesëtar i stafit apo persona nën përgjegjësinë e klubit të kenë ushtruar dhunë, ashtu siç u pretendua më herët, për sulm fizik ndaj Emiljano Mustës.
Ndër të tjera, Elbasani fton palën “akuzuese” që të paraqesë fakte, për të gjitha akuzat e bëra. Sipas klubit “verdheblu” këto akuza janë të pabazuara dhe se Elbasani nuk do të heshtë para diçkaje të tillë.
DEKLARATA:
Në lidhje me pretendimet e publikuara pas ndeshjes AF Elbasani – KF Vllaznia, klubi ynë hedh poshtë kategorikisht çdo akuzë për mosrespektim të procedurave të organizimit të një ndeshjeje pa praninë e tifozëve, si dhe çdo pretendim për ushtrim dhune ndaj lojtarëve apo përfaqësuesve të ekipit kundërshtar.
Theksojmë qartë se nga ana e AF Elbasanit, stafit apo personave nën përgjegjësinë apo jo të klubit nuk është ushtruar asnjë formë dhune. Përkundrazi, incidenti i dhunshëm i regjistruar pas përfundimit të ndeshjes është evidentuar dhe dënuar publikisht edhe nga Federata Shqiptare e Futbollit, në reagimin e saj zyrtar.
AF Elbasani, në bashkëpunim me kompaninë e sigurisë dhe përfaqësuesit e Policisë së Shtetit, ka ndjekur me përpikëri procedurat dhe masat e nevojshme për mbarëvajtjen dhe sigurinë e ndeshjes.
Ftojmë çdo palë që ka ngritur akuza ndaj klubit tonë të paraqesë fakte, prova apo materiale filmike konkrete që vërtetojnë pretendimet e bëra. Nëse paraqitet një provë e tillë për shkelje, klubi do të marrë menjëherë masat përkatëse.
AF Elbasani nuk do të heshtë përballë akuzave të pabazuara dhe nuk do të lejojë që emri i klubit të përdoret për të zhvendosur përgjegjësinë për ngjarje që nuk janë shkaktuar prej tij.
Discussion about this post