Elbasani prodhon çudinë e radhës, tender kompanisë anonime me mashtrim bilancesh

2 javë më parë

Djepi i kulturës dhe dijes, Elbasani tashmë po kthehet në vatrën e degradimit kulturor dhe total të shoqërisë, pasi apatia dhe klientelizmi i bashkisë së Elbasanit me pushtetin qendror, nëpërmjet Ujësjellësit ka finalizuar një tender që shkon kundër logjikës së tenderave dhe kundër konkurrencës.

Qyteti historik po përjeton ditët më të errëta në historinë e vet, nga pafuqia e cila e detyron të jetojë mes plumbave, drogës dhe anarkisë, na trazon me heshtjen e tij se si biznese me burime të panjohura mund të legjitimojnë të ardhurat nëpërmjet QKB-së duke ligjëruar kapitalet financiare. Frika është një aspekt, por mungesa e ligjit dhe ndëshkimit janë plehu që ushqejnë korrupsionin.

Kontrata me numër REF-30222-05-20-2022 me fond limit 15,9 milionë lekë ka shpallur fituese ofertën e kompanisë “AUTO KRASNIQI” shpk në pronësi të Sokol Krasniqit, një kompani anonime në fushën e prokurimeve publike e krijuar në 2020 dhe me xhiro vjetore maksimale 9 milionë lekë.

Jetëgjatësia e shkurtër e kompanisë nuk është problem themelor, por ai kthehet i tillë kur kushtet e dokumenteve standarde (DST) kërkojnë që kompania të ketë bilancet e tre viteve, 2019, 2020 dhe 2021. Bëhet problem kur kompania që akoma nuk ka deklaruar bilancin e 2021 nuk mund të flasë për xhiro vjetore, për bilance pozitive apo për lejet që ka për një sipërmarrje të tillë.

Të marrim e laps e letër nuk ia dalim të shkruajmë zullumet me prokurimin publik në bashkinë e Elbasanit. Lajmi në këtë rast është fakti se kompania është themeluar në vitin 2020, por ka të deklaruara bilancet për vitin 2019 dhe 2020. Për t’u siguruar se nuk kishte ndonjë gabim njerëzor verifikuam të dhënat në QKB të cilat konfirmuan të dhënat nga Open Data.

Garën për tenderin “AUTO KRASNIQI” shpk e ka fituar automatikisht duke u skualifikuar “Kadiu” Sh.a, i cili nuk ka bërë ankesë. Megjithatë ky nuk është rasti i parë kur kompani shpallet automatikisht fituese edhe pse konkurrenti ka më shumë eksperiencë dhe burime për të përballuar shërbime të tilla.

Vitin e kaluar kjo kompani ka fituar përsëri një kontratë publike pa garë me vlerë 5 milionë lekë për riparimin e automjeteve të Ujësjellësit Elbasan. Gara nuk ka pasur fitues dhe gjërat bëhen më tragji-komike kur sheh që tenderat e vetëm që ka fituar kjo kompani janë nga 1 milionë lekë ndërsa sot që flasim është sipërmarrësja e një kontrate, të cilën e ka fituar pa plotësuar kushtet.

Madje te tenderi i fundit që sollëm në vëmendje, kompanisë i kërkohet që shërbimin “Furnizim Vendosje Pjesë këmbimi për automjetet e shoqërisë” të tenderit ta ketë të afishuar në QKB, gjë e cila rezulton të jetë e pashkruar në QKB.

Duhet theksuar se ndryshimet e fundit në QKB kompania i ka bërë sot në 21 qershor, në datën që ka fituar edhe tenderin duke përforcuar dyshimet për piruetat për të manipuluar bilancet në QKB.

Të ngjashme