Kombëtarja U-19 e Shqipërisë është njohur sot me rivalët që do të përballet në garën e Europianit 2022-23.
Shorti u hodh ditën e sotme nga UEFA, ku skuadra e drejtuar nga trajneri Armando Cungu ka rënë në grupin 7, ku do të përballet me Spanjën, Belgjikën dhe Rusinë.
Pas hedhjes së këtij shorti, trajneri i kësaj përfaqësuesje, Armando Cungu ka folur për Federatën se e ka të qartë forcën e kundërshtarëve, por do të japë maksimumin.
“Sigurisht kemi përballë skuadra të një niveli të lartë. Sidoqoftë, ne do të përgatitemi të bëjmë paraqitje sa më të mira dhe të tregojmë vlerat e futbollit shqiptar. Që nesër do të nisim punën për të njohur sa më mirë kundërshtarët dhe t’i analizojmë në detaje. Nëse flasim për objektiva, duhet të qëndrojmë me këmbë në tokë dhe duhet të jemi ndërgjegjshëm për mundësitë që kemi ne”, – tha Cungu,
“Ajo që më intereson mua si trajner është të grumbullojmë e të rrisim sa më shumë lojtarë cilësorë që do t’i shërbejnë në të ardhmen Kombëtares A. Ky është objektivi primar, ndërsa objektivi i dytë është marrja e rezultateve pozitive. Nuk do të shkojmë në Belgjikë për turizëm, kjo është e sigurt, por shkojmë për të bërë më të mirën dhe për të marrë rezultate pozitive, pasi në fund të fundit në futboll çdo gjë mund të ndodhë”, – deklaroi trajneri i Kombëtares U-19
Discussion about this post