Elon Musk ka reaguar ndaj Bashkimit Evropian pas vendosjes së një gjobe prej 120 milionë eurosh ndaj platformës sociale X për shkelje të rregullave të transparencës, duke paralajmëruar se reagimi i tij do të synojë zyrtarët kryesorë që janë përgjegjës për këtë ndëshkim.
Deklaratat e Musk vijnë një ditë pas komenteve të Sekretarit amerikan të Shtetit, Marco Rubio, që e quajti gjobën ‘një sulm ndaj popullit amerikan’.
‘BE-ja vendosi këtë gjobë të çmendur jo vetëm ndaj X-it, por edhe ndaj meje personalisht, gjë që është edhe më absurde. Prandaj, duket se reagimi ynë duhet të synojë jo vetëm BE-në, por edhe personat që morën këtë vendim kundër meje. BE-ja duhet të shfuqizohet dhe sovraniteti të kthehet tek vendet anëtare, në mënyrë që qeveritë të mund të përfaqësojnë më mirë popujt e tyre’, shkroi miliarderi në platformën X.
Të premten, Komisioni Evropian vendosi një gjobë prej 120 milionë eurosh ndaj platformës X për shkelje të detyrimeve të transparencës sipas Ligjit për Shërbimet Dixhitale (DSA). Shkeljet përfshijnë dizajnin mashtrues të ‘shenjës blu’, mungesën e transparencës në reklama dhe dështimin për të dhënë akses tek të dhënat publike për studiuesit.
‘Ky mashtrim ekspozon përdoruesit ndaj mashtrimeve, përfshirë përdorimin e identitetit të rremë, si dhe forma të tjera manipulimi nga aktorë keqdashës,’ sipas Komisionit, i cili sqaron se ‘ndërsa Ligji për Shërbimet Dixhitale nuk kërkon verifikim të detyrueshëm të përdoruesve, ndalon qartë platformat të pretendojnë rrejshëm se një përdorues është verifikuar kur kjo nuk ka ndodhur.’
Siç deklaroi zëdhënësi për çështje teknologjike i Komisionit, Thomas Renier, ‘qëllimi nuk është të ndëshkojmë platformat, por që ato të përputhen me ligjet për shërbimet dixhitale’.
Për këtë arsye, platformës X i jepet një afat prej 60 ditësh pune për të informuar Komisionin mbi masat konkrete që synon të marrë për të eliminuar shkeljen që lidhet me përdorimin mashtrues të shenjave blu.
Discussion about this post