Emërimi i Nevil Dedes në stol, ka ndezur shpresat në Elbasan. Në qytet besojnë se do të jetë viti i verdhebluve. E duan kaq shumë rikthimin në elitën e futbollit shqiptar, aty ku mungojnë prej disa vitesh.
Entuziazëm ka edhe në radhët e ish-futbollistëve dhe sidomos atyre që kanë luajtur bashkë me trajnerin, kur ky i fundit ngriti trofeun e titullit kampion si kapiten.
Në një prononcim për “Panorama Sport”, është Egert Kuçi që “skanon” zgjedhjen e bërë nga klubi. Ai vlerëson aftësitë e teknikut për të krijuar grupin, duke kujtuar edhe kohët kur luante me të në fushë.
“Të gjithë e mbajmë mend kur Elbasani u shpall kampion dhe Nevil Dede ngriti trofeun si kapiten. Unë sapo isha afruar në ekipin e parë dhe ishte ai që u qëndronte mjaft pranë të rinjve, duke krijuar frymën e grupit si kapiten në skuadër. Jam i bindur se të njëjtën frymë do të krijojë edhe tani si trajner tek Elbasani.
Ka spikatur dikur si futbollist në këtë ekip dhe tani do të bëjë diferencën edhe si trajner, gjë që e ka treguar edhe te skuadrat e tjera ku ka trajnuar”, u shpreh fillimisht Egert Kuçi. Më tej, në lidhje me objektivat që do të ketë Elbasani, ai nuk e vë në dyshim se me përkrahjen që do t’i japin të gjithë, skuadra vitin tjetër do të jetë në Superiore.
“Dede, që ditën e parë që u prezantua, riktheu entuziazmin në këtë qytet sa i përket futbollit duke pasur një mbështetje të madhe nga ana e tifozëve. Nëse deri tani vinin në stadium tre mijë tifozë, jam i bindur se ky numër do të trefishohet dhe kjo do të jetë një ndihmë e madhe për ekipin. Nga ana tjetër di që financat do të jenë të shëndosha dhe nuk ka arsye pse skuadra të mos ngjitet më lart.
Të gjitha hallkat duket se po funksionojnë më së miri”, vijoi më tej ish-futbollisti i Elbasanit. Në lidhje me merkaton, Kuçi shprehet se ajo duhet të fokusohet kryesisht te lojtarët e Superiores. “Tani punët e merkatos i di më mirë trajneri me stafin dhe drejtuesit, por normalisht për të pasur një ekip që të mos vërë në diskutim ngjitjen duhen lojtarë nga Superiorja.
Nga informacionet që kam, di që janë piketuar disa. Mendoj që Dede do të dijë të zgjedhë ata që i duhen për të arritur objektivat”, u shpreh në prononcimin e tij për gazetën, Egert Kuçi, i cili aktualisht është trajner moshash tek ekipi i AF Elbasani./PanoramaSport
Discussion about this post