Emërimi i të afërmve të Felajt në Prokurorinë e Tiranës, Ngjela: Duhet të dorëhiqen, ndryshe…

Avokat Spartak Ngjela tha në studion e News24 se në Prokurori dhe Gjykatë nuk lejohet emërimi i pjesëtarëve të të njëjtës familje.

Ngjela tha se këta persona ose duhet të japin dorëheqjen, ose duhet të nisë një kontroll se çfarë kanë bërë këta persona, që janë të gjithë familjarë, lidhur me çështjet penale.

Reagimi i Ngjelës erdhi pas emërimit në Prokurorinë e Tiranës të 4 familjarëve të afërt të deputetes së PS-së, Ermonela Felaj.

“Unë di të them që nuk lejohet, përgjegjësi mbajnë edhe ata që kanë bërë këto emërime. Unë s’do të çuditesha që jo vetëm të emëruarit që paskan lidhje familjare, por edhe ata që i kanë emëruar të dorëhiqen”, tha Ngjela.

Madje ai paralajmëroi se rasti në fjalë mund të hetohet edhe nga Prokuroria e Posaçme, për të parë çfarë benefitesh kanë këto që janë lidhje familjare që emërohen në të njëjtin institucion.