Ministria e Arsimit ka emëruar Rezarta Allan në krye të Drejtorisë së Përgjithshme të Arsimit Parauniversitar. Lajmin e ka bërë të ditur vet ministrja e Arsimit, Evis Kushi, ku sipas saj Alla u zgjodh pas një procedure konkurrimi që zgjati më shumë se një muaj.
“Prezantuam sot në krye të Drejtorisë së Përgjithshme të Arsimit Parauniversitar znj. Rezarta Alla, e cila siç ka drejtuar prej disa vitesh me profesionalizëm dhe integritet Gjimnazin “Ismail Qemali” në Tiranë, jam besimplotë që do të sjellë frymë dhe energji të reja për të vijuar me sukses zbatimin e politikave tona në të gjithë sistemin arsimor parauniversitar”- shkruan ministrja Kushi.
Rezarta Alla ka një përvojë 30 vjeçare në fushën e arsimit dhe e ka nisur misionin e arsimtares si mësuese e Gjuhës Shqipe dhe Letërsisë në Dibër. Në vitin 1999 punoi si mësuese në shkollat 8-vjeçare “Musine Kokalari” në Tiranë dhe në shkollën e mesme të përgjithshme “Abdulla Keta”.
Në vitin 2008 ajo u bë pjesë e një prej gjimnazeve më të mira “Ismail Qemali”, ku deri në vitin 2017 punoi si mësuese Gjuhë-Letërsie. Në periudhën në vijim Znj. Alla mbajti rolin e drejtueses së gjimnazit “Ismail Qemali”. Znj. Alla, krahas Masterit Shkencor në “Gjuhësi” dhe Masterit Profesional në “Menaxhim Arsimi”, është vlerësuar me shumë certifikata që lidhen me fushën e arsimit, komunikimit dhe teknologjisë.
Discussion about this post