Rizgjedhja e Emiriana Sakos në krye të bashkisë së Durrësit u ka kushtuar shtrenjtë qytetarëve durrsakë sepse nga sot atyre u duhet të paguajnë më shumë për taksën e Gjelbërimi e cila është 5-fishuar. Në një kohë që shqiptarët përballen me nivelin më të lartë të inflacionit në 20 vite, ngritjen e çmimeve prej luftës dhe mungesës së vigjilencës nga qeveria ndaj tregtarëve, Sako ka menduar si të rrënojë buxhetin e familjarëve.
Konkretisht tarifa e taksës së Gjelbërimit është ndarë sipas zonave ku zona A e qytetit të Durrësit që përfshin 52 mijë familje ka paguar më parë 200 lekë të reja ndërsa zona B me rreth 19 mijë familje ku përfshihet njësia Sukth, Fshati Perimore, njësia administrative Rrashbull, fshati Rrashbull, Shkallnur, Xhafzotaj, Manëz Fsh, qendër njësia administrative Ishëm si dhe njësia administrative Katund i Ri kanë paguar 50 lekë të reja.
Me taksën e re të Gjelbërimit, banorët e zonës A të qytetit duhet të paguajnë 1000 lekë të reja ndërsa banorët që jetojnë në njësitë administrative të përfshira në zonën B do paguajnë 200 lekë të reja. Ajo që bën përshtypje është fakti se Durrësi ka shumë pak ambiente gjelbëra për të mos thënë aspak pasi asfalti dhe betoni dominon sfondin e qytetit i cili verën e kaluar vuajti nga grumbullimi i plehrave të cilat natën ndotnin qytetin me zjarret.
Discussion about this post