Forcat speciale policore kanë nisur ditën me disa aksione në qarqet e vendit teksa destinacion ka qenë edhe Durrësi. Në kuadër të operacionit të koduar “Misioni”, u bë arrestimi në flagrancë i tre personave të cilët dyshohet se do kryenin një vrasje, kundrejt pagesë. Më konkretisht gjatë aksion u arrestuan Aldi Mustafa, 35 vjeç, banues në Durrës, i dënuar më parë për veprat penale “Kanosja” dhe “Prodhimi dhe shitja e narkotikëve”, i dënuar më parë me 10 vite burg, në Gjermani; Uran Zyka, 40 vjeç, banues në Durrës, i dënuar më parë për veprën penale “Kanosja”. Të dy këta shtetas janë me precedent të theksuar kriminal në fushën e krimeve ndaj personit; Tahir Gjinika, 33 vjeç, banues në Durrës.
Personat në fjalë, qarkullonin në lagjen nr.15, Durrës, me mjetin tip “BMË”, me drejtues Aldi Mustafa. Në momentin e ndërhyrjes nga shërbimet e Policisë, të tre shtetasit kanë tentuar të largohen duke goditur mjetin e shërbimit të Policisë dhe duke rrezikuar jetën e punonjësve të Policisë që ishin në operacion, por nuk kanë mundur dot pasi janë bllokuar nga mjete dhe shërbime të tjera të Policisë.
Gjatë kontrollit të ushtruar në mjet u gjetën: 3 armë zjarri pistoletë me fishekë në fole, 1 armë zjarri mitraloz me fishekë në fole gati për qitje, municion luftarak, 2 laptopë, 9 telefona celularë dhe 1600 euro, të cilat u sekuestruan në cilësinë e provës materiale së bashku me automjetin.
